Verko: Infano strangolanta anseron

Description

“Boethos, kvankam estas pli bone el arĝento, elstare faris infanon, kiu sufokas anseron”, Plinio.

Danke al ĉi tiu fragmento de Plinio, ni konas la aŭtoron de ĉi tiu skulptaĵo, kiu prezentas infanon ludantan aŭ luktantan kun ansero. Ĉi tiu reduktita kopio (32 centimetrojn alta) inspiriĝas de la roma marmora kopio (92,7 centimetrojn alta) de greka bronza originalo. La greka skulptisto Boeto el Kalcedono kreis ĝin ĉirkaŭ la dua jarcento antaŭ Kristo.

La skulptaĵo havas piramidan aranĝon. La infano estas prezentita staranta, kun disigitaj kruroj por konservi stabilecon. La busto estas fleksita malantaŭen por igi pli efika la premon faritan per la brakoj ĉirkaŭprenantaj la longan kolon de la ansero kontraŭ sia maldekstra ŝultro. La korpo de la ansero estas senmovigita, premite en la ĉirkaŭpreno de la infano. Forte kontrastas la aspekto de la pufvanga kaj bele kombita infano kaj la perforto de la ago sufoki la beston. La vizaĝesprimo kaj la rigardo de la infano montras ian cinikon, kiu kontraŭas la naturan infanan senkulpecon. La ansero estas priskribita laŭ atenta observado de naturo, kun plumoj de tipo, grando kaj diko diversaj, kruroj kaj beko manlibreske pentritaj.

La pritraktita temo konformiĝas al la tipa sinteno de tiu historia kaj arta periodo, la periodo Helenisma: interesiĝo pri ĉiu aspekto de la vivo, eĉ plej banala, plej ĉiutaga, eĉ pri la malplej agrablaj aŭ spiritaj; naskiĝas, en la arta produktado, la “ĝenro“: skulptistoj ŝajnas interesiĝi pli multe pri la kreo de reliefaj pejzaĝoj sur multkoloraj platoj el marmoro, aŭ pri la portretigo de ebriaj maljunulinoj ol pri serĉado de pureco de absoluta formo.