Verko: Plastika konstruaĵo

Description

“Ligi ne malŝparis tempon, li sindone laboris, arte plenkonscia, li kreis skulptaĵojn malproksimajn de teknologiaj modoj, per elstare lerta manlaborado”, Enrico Gallian.

“Costruzione plastica” (Plastika Konstruaĵo) estas malgranda skulptaĵo alta 25 cm, realigita el bronzo kaj ligno de la skulptisto Fulvio Ligi en 1988 kaj de li donacita al Muzeo Homero.

Pripalpante la verkon ekde la malsupro oni perceptas ortangulan lignan bazon, sur kiu kuŝas malalta neregula bronza seslatero. Sur ĝi staras du vertikalaj paralelepipedoj kun ortangula bazo, kiuj malantaŭe intersekciĝas kun alia horizontala paralelepipedo. La tri bronzaj blokoj kuniĝas en la mezo. Ĉiuj geometriaj solidoj konsistigantaj la skulptaĵon ne estas perfekte regulaj kaj prezentas liniojn ne rektajn, sed iom kurbajn.

La ligna bazo estas polurita, glata ĉe palpado, kun cirklaj vejnoj pli malhelkoloraj. La bronza parto, male, estas malglata, nepolurita, brunkolora. La artisto ludis per kunmeto de la diversaj elementoj kiuj animas la verkon, proksimigante akrajn eĝojn al linioj pli mildaj kaj kurbaj. La malgrandaj dimensioj de la verko ebligas komfortan palpan esploradon.

La arta vojo de la markiano Ligi startas el lia origina Montefeltro, en la teritorio de Urbino. Liajn verkojn, ĉu monumentajn ĉu etdimensiajn, karakterizis dum longa tempo abstraktaj geometriaj konstruaĵoj realigitaj el materialoj kiel aluminio kaj ŝtalo. En la lastaj jaroj lia skulptaĵo estis orientita al serĉado de geometria formo mildkontura, kurblinia, difinanta spacon plurfacetan sed plenan.